Det er krav om at alle bustadar også fritidsbustader skal ha minimum ein godkjent røykvarslar i kvar etasje, som skal dekke kjøkken, stove, sone utanfor soverom og sone utanfor teknisk rom. Alarmen skal høyrast tydeleg på alle soveromma når dørene mellom romma er lukka. Ein bør ha røykvarslar i alle soverom og opphaldsrom. Brannvernet anbefaler røykvarslarar med seriekopling.

Eigar skal og sørgje for at bustadar og fritidsbustadar er utstyrt med manuelt sløkkjeutstyr som kan brukast i alle rom. Eigar skal sørgje for at bustad og fritidsbustad er utstyrt med minst eit av følgjande sløkkeutstyr:

- Formfast brannslange med innvendig diameter på minst 10 mm som er fast tilkopla vassforsyningsnettet.    

- Pulverapparat på minst 6 kg med ABC - pulver

- Skum- eller vassapparat på minst 9 liter

- Skum- eller vassapparat på minst 6 liter med effektklasse på minst 21A

- Anna manuelt sløkkjeutstyr med tilsvarande sløkkjekapasitet

Eigar skal sørgje for at røykvarslar og manuelt sløkkjeutstyr i bustadar og fritidsbustadar vert kontrollert med funksjonsprøve eller ettersyn i samsvar med leverandørens rettleiingar, og at dei vert vedlikehaldne slik at dei fungerer som tiltenkt.

Eigar av eitkvart brannobjekt skal sørgje for at rømingsvegane til ei kvar tid dekkjer behovet for rask og sikker røming. Frå bustad kan vindauge som har underkant mindre enn fem meter over planert terreng vere ein av rømingsvegane, dersom føresetnadane til vindauge som rømingsveg er oppfylt. Vindauge som ligg høgare enn fem meter over planert terreng kan nyttast som rømingsveg, når det er gjort tiltak som gjev tilsvarande sikkerheit. Vindauge i soverom bør generelt vere til å opne.

Ved spørsmål ta gjerne kontakt.

• Sjekk at komfyr, vaskemaskin og tørketrommel er slått av
• Slå av TV med av-knappen på apparatet, ikkje berre med fjernkontrollen
• Sjekk at levande lys er sløkt når du forlet eit rom
• Sjekk at ingen varmeomnar er tildekt
• Gjer rein kjøkkenvifte for brannfarleg fett
• Undersøk om det er svimerke eller sterk varmgang i sikringsskapet
• Sjå etter svimerke i leidningar, støpsel, kontaktar og lampar

Les meir om brannsikkerheit i bustaden din på nettsida Sikker hverdag (Direktoratet for samfunnssikkerhet og beredskap)