Lokale satsingsområde og prioriteringar
Målet med SMIL- ordninga lokalt er å (1) legge til rette for eit levande jordbruks- og kulturlandskap gjennom tildeling av midlar som er med på å styrke den lange kulturhistoria landbruket i kommunen har, (2) sikre at verdifulle natur- og kulturmiljø i kommunen vert teke vare på og skjøtta, (3) betre tilstanden til kulturminna jordbruket sitt kulturlandskap, (4) redusere forureininga frå landbruket, (5) betre tilstanden for utsette vassførekomstar i jordbruksdominerte område i kommunen, (6) redusere landbruket sitt klimaavtrykk, (7) følgje opp måla i kommunen sin klima- og energiplan og (8) betre allmennheita sin tilgang til jordbrukslandskapet, samtidig som ein tek vare på landbruks- og beiteinteressene.
I Sykkylven kommune ønskjer vi spesielt å ta vare på:
- Stølslandskapet og seterkulturen
- Landbruksområde med høge miljøverdiar, som semi-naturleg eng (slåttemark og naturbeitemark), samt artsrike kant- og buffersoner.
- Eit representativt utval av bygningar som høyrer til det tradisjonelle kulturlandskapet.
- God økologisk tilstand på vassdraga i kommunen.
- Viktige turområde.
Målgruppe for ordninga
Aktive bønder, samt grunneigarar som leiger bort jordbruksareala sine til aktive bønder. Meir informasjon og rettleiande tilskotssatsar finn du på kommunen sin informasjonsside om SMIL- ordninga.
Slik søkjer du
Søknadsfristen er 15. april kvart år.
Søknaden skal gi eit tilstrekkeleg bilete av kva som skal gjerast. Det skal leggast ved kostnadsoverslag som viser anslått totalkostnad for prosjektet, både materialkostnader, kjøp av tenester og eigen arbeidsinnsats skal vere med. I tillegg skal det leggast ved kart som viser arealet/ objektet sin lokalisering. Bruk gjerne Gardskart. Fotografiar og andre relevante dokument kan også leggast ved.
Søknadsskjema SMIL
Tilskot til drenering
Eigar av, eller føretak som leiger, tidlegare grøfta jordbruksareal med behov for ny drenering kan søkje om tilskot til drenering. Søknaden skal leverast elektronisk via Altinn. Søknadsfristen er 15. april kvart år. Tilskot til drenering av jordbruksjord, avgrensa til systematisk grøfting, profilering og omgraving utgjer 4000 kroner per dekar. Ved anna grøfting kan ein få 61 kroner per løypemeter grøft avgrensa oppad til 4000 kroner per dekar.
Søknadsskjema drenering
Innvilga tilskot får du utbetalt etter at du har dokumentert at tiltaket er gjennomført. Tiltaket må gjennomførast innan tre år frå da søknaden blei innvilga.
Meir informasjon om ordninga finn du på Landbruksdirektoratet sine nettsider.