§ 1 Retningsliner og formål

Skulefritidsordninga (heretter SFO) i Sykkylven kommune skal drivast i samsvar med skulen sin formålsparagraf, sentralt vedtekne lover og forskrifter, og kommunale vedtekter. SFO er regulert i opplæringslova § 13-7. Opplæringslova kapittel 9A, elevane sitt skulemiljø, omfattar også SFO. Likeeins gjeld kap. 12 i forskrift til opplæringslova: Tryggleik for elevane. Forskrift om miljøretta helsevern i barnehagar og skuler gjeld også for SFO.

Kommunen har tilbod om skulefritidsordning før og etter skoletid for 1.-4. trinn, og for barn med særskilte behov på 1.-7. trinn. SFO skal leggje til rette for leik, kultur- og fritidsaktivitetar med utgangspunkt i alder, funksjonsnivå og interesser hos barna. SFO skal gi barna omsorg, tilsyn og gode utviklingsvilkår. Areala, både ute og inne, skal vere eigna for formålet.

Fri leik og styrte aktivitetar skal fremje barna sine språklege ferdigheiter og sosiale kompetanse. Gjennom å vere ein del av SFO, vert barna si læring i både formelle og uformelle situasjonar styrka, og barna sine kulturelle og individuelle ulikheiter vert ein del av mangfaldet i SFO-kvardagen. SFO-tilbodet skal bidra til sosial og uformell læring, fysisk utfalding, lære barna gode matvanar, i tillegg til å bidra til inkludering av barn med annan kulturbakgrunn og barn med særlege behov. Barna sin rett til medverknad står sentralt også i SFO. Barna som er i SFO skal verte høyrde og involverte i planlegging og gjennomføring av aktivitetar og organisering / tilrettelegging elles.

SFO er ikkje ein del av grunnskuleopplæringa og er eit frivillig tilbod. SFO må ha eigne ordensreglar.

§ 2 Eigarforhold og leiing

§ 2-1 Skuleeigar

Sykkylven kommune ved kommunestyret er eigarar av SFO på kommunale skular. Etter vedtak i kommunestyret er SFO lagt under levekårsutvalet. Administrativt ligg SFO under kommunedirektøren, delegert til kommunalsjef for oppvekst og kultur.

§ 2-2 Skuleleiar

Rektor / einingsleiar har det overordna økonomiske, administrative og pedagogiske ansvaret for ordninga ved den einskilde skule. I tillegg skal skulen ha ein SFO-leiar som har ansvar for den daglege drifta av SFO. SFO-leiar er ein del av skulen sitt leiarteam og rapporterer til rektor.

§ 2-3 FAU / SU og foreldremøter

Samarbeidsutvalet (SU) er SFO sitt styre ved den einskilde skule. SFO-leiar har møte- og uttalerett i SU.

Det veljast ein foreldrerepresentant til foreldra sitt arbeidsutval (FAU) blant foreldra som har barn i SFO. FAU fungerer som foreldreråd også for SFO. Foreldrekontakten skal sikre barna og foreldra sine interesser i SFO og fungere som eit bindeledd mellom barna/foreldra, den daglege leiinga og skulen si leiing. Alle foreldre som har barn i SFO skal verte kalla inn til minst eitt foreldremøte i løpet av skuleåret.

§ 2-4 Barna sin rett til medverknad

Barnekonvensjonen artikkel 12 gir barnet rett til å seie si meining og å bli høyrt. Barna skal verte engasjert i planlegging og gjennomføring av innhaldet i SFO-kvardagen, samt i arbeidet med helse, miljø og tryggleik ved skulefritidsordninga.

§ 3 Opningstider

Skuledagar vil SFO-avdelingane vere opne:

• Med forbehald om lokale tilpasningar: Frå kl. 07:15 – til skulestart.
• Med forbehald om lokale tilpasningar: Frå skuleslutt til kl. 16:15.
• Dei dagane det ikkje er skule (skulefrie dagar) vil SFO-tilbodet halde opent frå kl. 07:15 – 16:15, med forbehald om lokale tilpasningar.

Ordninga har stengt laurdagar og søndagar, 5 planleggingsdagar, julaftan, i romjula, påskeveka og 4 veker i fellesferievekene.

§ 4 Opphaldstilbod og betaling

§ 4-1 Satsar for SFO-tilbod

Langdagar er dagar det ikkje er undervisning på skulen, men SFO held opent frå kl. 07:15- 16:15. Oversikt over SFO-året sine langdagar vil kome fram i SFO-ruta (heimesida).

§ 4-2 SFO-tilbod for elevar med særskilte behov på 1.-7. trinn

Barn med særlege behov har ikkje rett til spesialundervisning i skulefritidsordninga fordi SFO ikkje er ein del av grunnskuleopplæringa og kapittel 5 i opplæringslova gjeld berre for grunnskuleopplæring. PP-tenesta er ikkje sakkunnig instans i høve SFO. Føresette kan ikkje krevje at verken PP-tenesta eller andre instansar sine anbefalingar vert vektlagt når kommunen skal vurdere behovet for skulefritidsordning. Kommunen bør likevel lytte til råd og vurderingar frå ulike instansar som kjenner barnet og som kan ha nyttig informasjon om barnet sine behov og funksjonsnivå.

5.-7. trinn: Kommunen skal ha skulefritidsordning for elevar med særskilte behov på 5.-7. årstrinn. Tilbodet er eit enkeltvedtak og behovet må dokumenterast av sakkunnig instans, t.d. lege, spesialist, etc. og vere i tråd med individuell plan (IP). Skulen er også viktig i vurderinga ut i frå at dei kjenner eleven godt. Tilbodet er utan foreldrebetaling.

§ 4-3 Foreldrebetaling

SFO er finansiert av foreldrebetaling og Sykkylven kommune. Satsen for foreldrebetalinga vert fastsett av kommunestyret årleg. Eventuelle endringar gjeld frå 1. januar og vert oppdatert på kommunen si heimeside 

a. Foreldrebetaling skal krevjast inn med 11 betalingsterminar (månadar), det vil seie frå 1. august til og med 30. juni. Juli er betalingsfri. Foreldrebetalinga vert krevd inn for heile månadar. For elevar som blir innmeldt etter skulestart, vert det krevd foreldrebetaling frå og med den 1. i månaden eleven er meldt inn i ordninga.

b. Det blir ikkje gitt fråtrekk for fråvere. Ved langvarig sjukdom kan familiar søke om permisjon og betalingsfritak. Sjå § 6.

c. Det vert laga eit lett måltid kvar dag. Matpengar er lagt inn i foreldrebetalinga, sjå informasjon på heimesida. Skulefrie dagar vert det laga eit lett fruktmåltid og lunsj. Elevane tek med eigen frukost.

d. Manglande foreldrebetaling (misleghald) gir grunn for oppseiing av plassen. Utestengingsvedtak kjem i eige brev. Oppseiingsfristen frå kommunen si side er ein månad, rekna frå månaden etter at oppseiingsvedtaket vart gjort.

Dersom ein familie har uteståande restansar for opphald i SFO og barnehage, kan familien sine barn likevel verte tildelt plass ved hovudopptaket, men restansen må vere betalt før barnet får begynne i SFO.

§ 4-4 Moderasjonsordningar

• Lokalt vedtak: Søskenmoderasjon: det vert gjeve søskenmoderasjon tilsvarande 25 % på barn nr. 2, deretter 40 %.
• Sentralt vedtak: Redusert foreldrebetaling: Foreldrebetalinga til SFO skal maksimalt utgjere 6 % av den samla person- og kapitalinntekta i hushaldninga for eit barn i SFO på 1.- 4. trinn
• Sentralt vedtak: Barn med særskilte behov på 5.-7. trinn skal ha gratis tilbod i SFO

§ 4-5 Skulefrie dagar

På skulefrie dagar er det ikkje undervisning, men SFO held opent frå kl. 07:30 til 16:15, jf. § 3 Opningstider. Ein skulefri dag reknast som ein heil dag, og kan ikkje delast over fleire, korte dagar.

Det er bindande påmelding til feriar og fridagar. Foreldre må melde inn innan 1. mai kvart år når barna skal ha sommarferie frå SFO. Minimumstalet for påmelde barn for å halde ope på skulefrie dagar er 7 barn. Samarbeid mellom kommunale SFO-ordningar kan vere aktuelt for å kunne gi eit tilbod når det er færre påmelde barn pr. avdeling, sjå § 4-6.

§ 4-6 Kommunalt samarbeid i feriar

I skulen sine feriar og fridagar kan to eller fleire skulefritidsordningar samarbeide om å tilby heildagstilbod. Det er SFO-avdelinga på den skulen eleven går, som har ansvar for å lage eventuelle samarbeidsavtalar med andre skulefritidsordningar og det skal vere bemanning frå begge avdelingane.

§ 5 Opptak av barn

§ 5-1 Opptakskriterium

Barnet skal gå på SFO på den skulen han/ho er elev. Tilbodet gjeld for alle barn på 1. til og med 4. trinn og for barn med særskilte behov frå 1. til og med 7. trinn.

Opptak av barn med særlege behov i 5.-7. trinn skjer etter uttale frå sakkunnig instans / i tråd med individuell plan (IP). Rektor fattar vedtak i samarbeid med leiar i SFO. Avslag på søknad kan bli påklaga til kommunen sitt klageutval, formannskapsutvalet. SFO-opphald for elevar med særskilte behov i 5.-7. trinn er utan foreldrebetaling.

§ 5-2 Hovudopptak

Hovudopptaket av barn skjer om våren med søknadsfrist 1. mars, og gjeld for oppstart 1. august. Om det er ledige plassar, kan barn bli tekne inn også i løpet av skuleåret. Alle barn som søker SFO får tildelt plass. Barna vert tildelt plass til dei går ut 4.trinn eller til skriftleg oppseiing vert levert frå føresette. Dette betyr at føresette ikkje treng å søke om fornya SFO-plass ved nytt skuleår frå og med 2. trinn.

På kommunen si heimeside er det lenke til elektronisk søknadsskjema om plass i SFO i Visma Flyt Skole (innlogging med MinID).

SFO-året startar 1. august og vert avslutta 31. juli påfølgande år.

Opptak skjer ved den einskilde skule etter søknad frå føresette i Visma Flyt Skole. Føresette må stadfeste at dei er kjende med innhaldet i vedtektene før søknaden kan sendast.

Opptaket skjer om våren og gjeld til det vert levert skriftleg oppseiing med oppseiingstid på to månadar frå den 1. i påfølgande månad.

§ 5-3 Saksbehandling

Tildeling av plass, avslag på søknad om plass og oppseiing av plass er eit enkeltvedtak med klagerett etter forvaltningslova § 2.

§ 6 Endring av tildelt tilbod

Føresette søkjer om plasstype gjennom det elektroniske søknadsskjemaet på Visma Flyt Skole. Endring av tildelt tilbod i løpet av skuleåret skal avgjerast av skulen, etter skriftleg varsel / søknad frå føresette i Visma Flyt Skole.

• Auke av opphaldstid kan gjerast straks dersom det er plass i SFO.
• Reduksjon av opphaldstid har oppseiingsfrist på 2 månad, gjeldande frå den 1. i etterfølgjande månad. Ein må betale for plassen i oppseiingstida, sjølv om ein ikkje nyttar heile plassen fullt ut.

Det er ikkje mogleg å endre SFO tilbodet og seie opp SFO-plassen same månad. Barn i SFO, som på grunn av alvorleg og langvarig sjukdom må ha permisjon eller gå ut av ordninga, kan etter søknad vedlagt legeattest få avkorta oppholdsbetaling eller oppseiingstid.

§ 7 Oppseiing av SFO-tilbodet

SFO-plassen skal seiast opp skriftleg. Oppseiingstida er 2 månadar og gjeld frå den 1. i etterfølgjande månad. Ein må betale for plassen i oppseiingstida sjølv om ein ikkje nyttar den. Dersom plassen vert sagt opp etter 31. mars, må ein betale ut skuleåret (t.o.m. juni).

§ 8 Kjøp av einskilddagar i SFO utover tildelt tilbod

Vedtak i levekårsutvalet 16.01.2017: Barneskulane i Sykkylven kommune kan unntaksvis tildele einskildelevar dagsopphald i SFO for å avhjelpe heilt spesielle situasjonar. Dette er meint som ei moglegheit for å avhjelpe eit kortvarig behov, for eksempel ved sjukdom, familiar med spesielle behov eller hendingar som ikkje kan planleggast, og skal ikkje ha varigheit utover nokre dagar. Dagsprisen er oppgitt på heimesida til kommunen.

§ 9 Bemanning

Bemanninga vert tilpassa behov på dei ulike SFO-ordningane av rektor/einingsleiar i samarbeid med SFO-leiar. Bemanninga skal stå i forhold til talet barn som er til stades, barna sin alder og behovet for tilrettelegging for einskiltbarn / grupper av barn.

Bemanninga skal vere forsvarleg i høve barna sin alder og føresetnader. Det betyr ein bemanningsnorm som er fleksibel og kan tilpassast behov. Barn med særskilte behov for ekstra tilsyn og omsorg kan utløyse tilleggsressursar i SFO.

Skulefritidsordninga er ansvarleg for barna sin tryggleik. Tilsynet må i praksis vere forsvarleg i forhold til risikoen for at skade eller ulykke kan skje, jf. opplæringslova § 9a-9 og forskrift til opplæringslova § 12-1.

§ 10 Måltid

Det vert laga eit lett måltid kvar dag. Matpengar er inkludert i betalingssatsane. Barna har med eigen mat til morgonmåltidet.

Langdagar (skulefrie dagar) er det to måltid, eit fruktmåltid og lunsj. Barna har med eigen mat til morgonmåltidet.

§ 11 Leike- og opphaldsareal, inne- og utemiljø

SFO har base på kvar barneskule og har tilgang til nødvendige tilleggsareal på skulen. SFO kan nytte skulen sitt areal både ute og inne.

Kapittel 9a i opplæringslova gjeld også for skulefritidsordninga. Etter § 9a-1 har alle elevane rett til eit godt fysisk og psykososialt miljø som fremjar helse, trivsel og læring. Arealet inne og ute skal vere tilpassa den aktiviteten som vert driven i den einskilde SFO-avdelinga.

§ 12 Skyss til og frå SFO

Barn som har plass i SFO og som på grunn av funksjonshemming eller midlertidig skade eller sjukdom har behov for skyss, har rett til skyss til og frå SFO. Søknad om tilrettelagt skuleskyss vert sendt til kommunen. Dokumentasjon frå sakkunnig lege/spesialist som grunngjev behovet for særskilt tilrettelagt skyss samt varigheit, må følgje med søknaden. Retten gjeld uavhengig av avstanden mellom heimen og SFO-avdelinga. Retten gjeld ikkje i skuleferiane.

Funksjonsfriske barn har ikkje rett til skyss til og frå skulefritidsordninga, jf. opplæringslova § 7-3. Dette gjeld sjølv om barnet har rett til skyss til og frå skulen. Elevane som har rett til skuleskyss skal meldast inn i skuleskyssportalen til fylkeskommunal skyss av skulen, uavhengig av om dei har plass i SFO. Dette betyr at dei får busskort sjølv om dei går på SFO.

§ 13 Legemiddelhandtering i SFO

For at eit barn som har behov for hjelp til å ta legemiddel skal kunne benytte seg av tilbodet, har SFOordninga plikt til å sørge for slik hjelp når barnet oppheld seg der. Det vert vist til Samtykke og avtale om ansvar for medisinering av barn/elev i barnehage, på skule/SFO, som ligg på heimesida.

§ 14 Politiattest

Tilsette i SFO må legge fram gyldig politiattest som viser at han eller ho ikkje er sikta, tiltalt eller dømt for seksuelle overgrep mot barn. Personar som er dømd for slike overgrep, kan ikkje verte tilsette i SFO, jf. opplæringslova § 10.9.

§ 15 Teieplikt

Medlemar i styrande organ for SFO og dei tilsette (herunder også studentar, vikarar og andre som oppheld seg på SFO) har teieplikt etter same reglar som gjeld for tilsette i grunnskulen, jf. forvaltningslova § 13a-13f.

§ 16 Forsikring

Barn i SFO er forsikra gjennom same forsikringsordning som gjeld for skuleelevar, gjennom Folketrygden og kommunen si forsikringsordning dersom det oppstår skade under opphald i SFO eller deltaking i aktivitetar arrangert av SFO.

§ 17 Endringar av vedtektene

Endring av vedtektene for SFO må verte tilrådd av Levekårsutvalet og vedtekne i kommunestyret. Samarbeidsutvalet ved kvar skule skal få vedtektene til uttale før dei vert vedtekne

§ 18 Retningslinjer

Det kan utarbeidast administrative retningslinjer til desse vedtektene.