Arbeidet skal etter planen starte umiddelbart etter ferien, og grunn- og terrengarbeid er venta å vare i 5 veker, og deretter er det planlagt 3 månader med gartnararbeid – det vil i praksis seie fram mot jul.

Det betyr naturlegvis at ein del av gartnararbeidet, t.d. såing av plen og ein del utplanting, ikkje kan gjerast før våren 2024. Men kantstein, belegningsstein, scene og amfi kan ferdigstillast i haust. Det same gjeld parkeringsområdet på nordsida mot Kyrkjeparken og busstoppet.

Dette kjem til å bli eit flott område og bør verte eit skikkeleg aktivum i sentrum og den aktiviteten som knyter seg til biblioteket, frivilligsentralen og Skaparlinken.

Amfiet skal byggast i nordre del av parken og skal kunne fungere som publikumsplass for det som foregår på scena. 

Byggekonstruksjonen som blir plassert på langveggen mot vest utanfor biblioteket skal fungere som scene, sittekant og opphaldsmulighet - naturlegvis med rampe for universell tilkomst.