Handlingsplan ved bekymringsfullt fråvær

Føremålet med handlingsplanen er tidleg koordinering av tiltak og støtte i høve elevar som har udokumentert fråvær frå undervisning i grunnskulen.

Sist endra 19.08.2024 14.03

Bekymringsfullt fråvær er

Ugyldig fråvær frå einskildtime (udokumentert).
Kome for seint meir enn 2 gongar i løpet av ei veke.
Fråvær meir enn 3 einskilddagar i løpet av ein månad.
Meir enn 15% fråvær i løpet av tre månader (9-10 dagar i løpet av 3 månadar er rekna som høgt fråvær - sum av dokumentert og udokumentert fråvær).

Føremål

Opplæringslova § 2-1 og 2-2 slår fast elevane sin rett og plikt til opplæring. Føremålet med handlingsplan og prosedyre i høve bekymringsfullt fråvær, er å få til tidleg koordinering av handling og ressursbruk i høve til elevar som har uforklart eller udokumentert fråvær frå undervisning i grunnskulen.
Prosedyra skal gi gode rutinar for registrering og oppfølging av fråværet, slik at skulevegring og skulk vert oppdaga tidleg. Samtidig skal prosedyren gi retning for det tverrfaglege arbeidet i kommunen knytt opp til elever med høgt fråvær. Tiltak bør iverksettast ved bekymringsfullt fråvær så tidleg som mogleg. Ein skal unngå å vente til fråværet vert høgt.

Målgruppe

Prosedyren omfattar alle elevar i grunnskulen i Sykkylven kommune, og skal gi retning til korleis det kommunale skulefråværsteamet skal arbeide i slike saker.

Generelt

Dei fleste born og unge går på skulen frivillig og utan problem. Det er likevel nokre som har vanskar med å kome seg på skulen, og det er viktig med informasjon om korleis skulen møter desse elevane.
Rektor må gå grundig gjennom fråværsrutinane med personalet ved starten av kvart skuleår.
Informasjon om rutinar skal gjevast på foreldremøte, der det også blir gitt klare signal på kva fråværsgrunnar som blir godtekne. Gode rutinar for kommunikasjon mellom heim og skule er viktig.
PPT, helsesjukepleiar og andre aktuelle instansar er viktige samarbeidspartnarar i saker der elevar har eit urovekkande fråvær.
Alt som vert gjort etter pkt. 1-9 nedanfor skal dokumenterast med logg og møtereferat som vert lagde på eleven si mappe. Send eventuelt kopi til gjeldande instansar.
Kommunen driftar eit skulefråværsteam samansett av representantar frå skule og barne- og familietenestene. Desse får opplæring i tema som knytt til bekymringsfullt fråvær; kartlegging, tiltak o.l. Teamet skal arbeide i samsvar med moderne prinsipp/tenking om temaet. Den innførte prosedyren skal gjerast kjend for alle føresette.
Skulefråværsteamet er eit rådgjevande team og skulen er sjølv ansvarlege for iverksetjing av tiltak og å følgje opp desse.

Gjennomføring

Alt fråvær skal registrerast av kontaktlærar. Faglærarar skal melde frå til kontaktlærar. Visma Min Skole-appen vert nytta som meldebok for føresette, kontaktlærar får fråværet inn i Visma Flyt Skule.
Elevfråvær skal takast opp jamleg i skulen sine faste møter, minimum ein gong pr. månad.
Føresette skal levere skriftleg melding til skulen ved alle typer fråvær, også timefråvær, helst gjennom Visma-appen. Etter avtale med kontaktlærar, kan melding om fråvær også gjevast på telefon, sendast som SMS eller på e-post.
Kontaktlærar skal ta kontakt med føresette dersom slik melding manglar.
Dersom fråværet varer meir enn tre dagar, skal føresette ta kontakt med skulen og melde frå om grunnen til fråværet. Dersom skulen ikkje får slik melding innan tre dagar, skal kontaktlærar ta kontakt med føresette.
Dersom ein elev har bekymringsfullt fråvær, skal kontaktlærar ha samtale med elev og føresette, der tiltak skal drøftast. Kontaktlærar skal orientere skuleleiinga skriftleg. Elevar med høgt fråvær som skuldast kronisk sjukdom og/eller er under behandling, må levere legeerklæring (PDF, 76 kB). Rektor skal skriftleg informere føresette om plikt og rett til grunnskuleopplæring; jfr. opplæringslova § 2-1 og 2-2.
Dersom fråværet held fram, vert elev og føresette gitt tilbod om samtale med helsesøster på skulen innan 14 dagar. Kontaktlærar tek kontakt med det kommunale skulefråværsteamet via meldeskjema. (PDF, 904 kB) Samstundes kallar skulen inn til møte med førsette, elev, skuleleiinga og skulefråværsteamet innan 14 dagar etter at meldeskjema er sendt.
Kontaktlærar og skuleleiinga vurderer om saka skal meldast til barneverntenesta.
I det vidare arbeidet med eleven, vil ein representant frå skuleleiinga på den aktuelle skulen delta på linje med dei andre medlemmane i skulefråværsteamet.

Skulen sine interne rutinar

Kontaktlærar er ansvarleg for å føre fråvær dagleg, og vurdere om fråværet er bekymringsfullt. Kontaktlærar har ansvar for å melde bekymringsfullt fråvær til rektor/skuleleiing.

Timelærar er ansvarleg for å registrere fråvær og informere kontaktlærar.

Teammøter/trinnmøter: Elevfråværet blir tatt opp jamleg (minimum ein gong pr. månad) som eiga sak.

Skuleleiinga ved rektor følgjer opp rutinar i handlingsplanen, og går gjennom fråværsstatistikk og fråværsføring to gongar i halvåret.

Foreldre / føresette si rolle

Føresette skal varsle skulen ved samanhengande fråvær ut over tre dagar. Ved fråvær skal føresette skrive melding i Visma foreldre-appen. Vidare må foreldre / føresette vere aktivt med i samarbeidet rundt eleven.